DC KHERI AFUNGUA MAFUNZO YA WENYEVITI WA VIJIJI NA VITONGOJI HALMASHAURI YA WILAYA YA IRINGA

Imewekwa : January 18th, 2025

Asema, “Ni lazima wanaopewa nafasi za kutumikia umma wajengewe uwezo wa kuifahamu katiba, sheria, kanuni, taratibu, na miongozo inavyosema ili maneno yao na matendo yao yasipingane na msingi wa kuanzishwa kwa ofisi zao”.

Mkuu wa Wilaya ya Iringa Mhe Kheri James amefungua mafunzo ya wenyeviti wa vijiji na vitongoji yaliyofanyika katika ukumbi wa shule ya sekondari ya wasichana Ifunda Januari 18, 2025.

Mhe. Kheri James amewataka wenyeviti hao kuwa wasikivu ili waweze kuelewa mipaka ya kazi na majukumu yao katika utendaji. Na kusisitiza kuwa lengo la mafunzo haya ni kutaka kuona serikali za mitaa zinafahamika vema, uongozi na utawala bora, miradi shirikishi na ushirikishwaji wa wananchi katika kuibua miradi na usimamizi wake, usimamizi wa fedha, na usimamizi wa masuala ya ardhi.

Aidha Mhe. Kheri amekumbusha kuwa maeneo yote ambako kuna migogoro ni maeneo ambayo sheria haifuatwi na ufumbuzi wake ni mafunzo kama haya yanayotolewa  kwa viongozi.

Kwa upande wake kaimu Mkurugenzi wa Halmashauri ya Wilaya ya Iringa Bi Beatrice Augustino amewashukuru wakufunzi wanaotoa mafunzo hayo sambamba na wenyeviti wa vijiji na vitongoji kwa mafunzo na kuwataka wenyeviti baada ya mafunzo kufanya kazi kwa ushirikiano na watendaji wa vijiji.

Mafunzo kwa wenyeviti wa vijiji na vitongoji yanayoendeshwa na wakufunzi kutoka Chuo cha Serikali za Mitaa Hombolo, Dodoma yanafanyika kwa siku mbili katika jimbo la kalenga na Isimani, tarehe 18 Januari, 2025 hadi 19 Januari, 2025.