ELIMU YA LISHE KWA VITENDO ITOLEWE MASHULENI KUJENGA UELEWA - NDG. MASUNYA

Imewekwa : November 27th, 2025

Wanafunzi wafundishwe namna ya kuandaa Bustani za mbogamboga kwa vitendo na kuambiwa madhara ya kutokula lishe bora.

Mwenyekiti wa kamati ya Lishe ya Halmashauri ya Wilaya ya Iringa Ndg. Robert Masunya ametoa wito kwa walimu na wadau wengine wa masuala ya lishe kuendelea kutoa elimu kwa jamii hasa wanafunzi mashuleni kwa vitendo juu ya uandaaji wa Bustani za mbogamboga na kusema kwamba mtoto anapojishughulisha ndipo na uelewa wake juu ya jambo husika unapokuwa.  

Aidha ndugu Masunya ameongeza kuwa wakati mwingi tumekuwa tukiongelea faida ya lishe bora jambo ambalo limeshazoeleka na halileti hamasa tena badala yake tuanze kuelimisha pia hata madhara ya kutokula lishe bora.

Ameyasema hayo wakati wa kikao cha Kamati ya Lishe (W) kilichofanyika kwa robo ya kwanza Novemba 27, 2025 katika ukumbi wa Ofisi ya Mkuu wa Wilaya ya Iringa.

Pamoja na mambo mengine taarifa ya utekelezaji wa afua za lishe iliwasilishwa kisekta Pamoja na wadau wa maendeleo wanaofanya shughuli za afua za lishe kama World Vision Tanzania, Care International, CUAMM n.k. na kujadiliwa.

Kwa upande wake Afisa lishe (W) Bi. Avelina Seleman ameeleza mafanikio yaliyopatikana katika utekelezaji wa afua za lishe ambayo ni Pamoja na kutolewa kwa fedha kwa Watoto chini ya miaka mitano ambayo ni kiasi cha sh.1667.9 kutoka kwenye mapato ya ndani ya Halmashauri na utoaji wa matibabu ya utapia mlo mkali kwa Watoto wa chini ya miaka 5 kufikia 94.1%

Aidha changamoto zilizobainishwa, Halmashauri kwa kushirikiana na wadau wengine wanaendelea kuzitafutia ufumbuzi ikiwa ni Pamoja na elimu ya malezi kwa jamii na miundombinu wezeshi kwa wanafunzi kama jiko, mabwalo ya vyakula, maeneo ya kuhifadhia vyakula kwa usalama, na miundombinu ya kunawia mikono.