Iringa DC Watoa Zawadi kwa Wagonjwa Hospitali ya Mkoa Iringa

Imewekwa : December 8th, 2022

Iringa DC Watoa Zawadi kwa Wagonjwa Hospitali ya Mkoa Iringa

Halmashauri ya Wilaya ya Iringa wametembelea na kutoa zawadi kwa wagonjwa katika Hospitali ya Rufaa ya Mkoa wa Iringa 8.12.2022, Ikiwa ni muendelezo wa kuadhimisha miaka 61 ya Uhuru wa Tanzania Bara.

Akizungumza kwa niaba ya Mkurugenzi Mtendaji Mkuu wa Idara ya Utumishi Bibi Beatrice Augustine amesema zoezi hilo limeratibiwa na Mkurugenzi Mtedaji Wakili Bashir Muhoja ambaye alipendekeza kwa Watumishi kuwa kuwepo na mchango kwa lengo la kuwatembelea wagonjwa na kuwapatia kile kilichopatikana.

“Zoezi hili ni la kujitolea na tunamshukuru Mkurugenzi wetu kwa kuratibu hili ikiwa ni sehemu ya kuadhimisha miaka 61 ya Uhuru wa Tanzania.”

Aidha amesema kuwa zoezi hilo halitaishia hapo bali litakuwa na muendelezo kwa siku zijazo kwani amevutiwa na kushawishika na kilichotokea na kuahidi kuwa watafanya vizuri zaidi kwa wakati mwingine.

Pia ameushukuru uongozi wa Hospitali ya Rufaa ya Mkoa wa Iringa kwa mapokezi mazuri na ya kupendeza kwani zoezi limefanikiwa kwa kiasi kikubwa na hakukuwa na changamoto yoyote ile bali ushirikiano mkubwa waliouonesha kwa kipindi chote walipokuwa hospitalini hapo.

Kadhalika ametoa rai kwa Taasisi na Watu binafsi kuendelea kufanya matendo ya majitolea kwa wahitaji kwani kwa kufanya hivyo basi pia Baraka za Mungu zitawafuata.

“Rai yangu kwa Taasisi na watu binafsi waje pia kuungana na wahitaji hata kama ni kwa kitu kidogo lakini kwa wahitaji ni kikubwa sana, inaweza isiwe hospitalini tu kuna vituo vyingi vya wahitaji, waende wapeleke majitoleo yao huko na Mungu atawaongezea.”

Wakiongea kwa nyakati tofauti tofauti baadhi ya Wagonjwa waliofikiwa na majitoleo hayo wameshukuru sana na kuwaomba kuendelea kuwakumbuka wagonjwa kama walivyofanya leo.

Kilele cha maadhimisho ya Miaka 61 ya Uhuru yaani tarehe 09.12.l2022 Kiwilaya yatafanyika katika Ukumbi wa Halmashauri ya Wilaya ya Iringa (Siasa ni Kilimo)  huku kukitarajiwa kuwepo kwa Mdahalo utakaohusisha kujadili, kutafakari kwa pamoja na kukumbuka tulikotoka, tulipo na tunakoelekea kuhusu Maendeleo Endelevu ambayo Nchi yetu adhimu Tanzania imeyafikia.