Mkuu wa Wilaya ya Iringa Mhe. Kheri James Aitaka kamati ya Mwenge Kukamilisha Maandalizi

Imewekwa : May 7th, 2024

Mkuu wa Wilaya ya Iringa Mhe. Kheri James Aitaka Kamati ya Mbio za Mwenge Kukamilisha Maandalizi

Ameyasema hayo Mei 07, 2024 wakati akikagua miradi na njia itakayopita Mwenge wa Uhuru. Amesisitiza kushirikishwa kwa Watendaji Kata na vijiji, Madiwani, Wenyeviti wa Vijiji, ili wananchi wajitokeze kwa wingi wakati wa Mbio za Mwenge wa Uhuru.

Akizungumza na Kamati hiyo Mhe. Kheri, ameipongeza Kamati kwa kuchagua miradi ambayo inaendana na vigezo vya Mbio za Mwenge wa Uhuru mwaka huu na kufurahishwa na ratiba iliyoandaliwa.

Baadhi ya miradi hiyo ni pamoja na Utunzaji wa mazingira, elimu vyumba vya madarasa na mabweni ya wanafunzi, daraja na vituo vya huduma za afya ambavyo vinatarajiwa kuzinduliwa na Mwenge wa Uhuru.

Naye Mratibu wa Mwenge Mkoa Ndugu Stephen Sanga amepokea maelekezo yote na kuahidi atayafanyia kazi kwa kushirikiana na Mratibu wa Mwenge Wilaya Bi. Sakina Mgaya.

Mwenge wa Uhuru 2024 katika Halmashauri ya Wilaya ya Iringa unatarajiwa kupokelewa mnamo mwezi Juni 26, 2024 ukitokea Halmashauri ya Mji Mafinga na baadaye  kukabidhiwa Mkoani Dodoma. Kauli Mbiu ya Mwenge wa Uhuru kwa mwaka 2024 "Tunza Mazingira na Shiriki Uchaguzi wa Serikali za Mitaa kwa Ujenzi wa Taifa Endelevu".