RC IRINGA AWAASA WAFANYAKAZI KUJIWEKEA AKIBA KWA AJILI YA MAISHA YAJAYO

Imewekwa : May 1st, 2024

Mkuu wa Mkoa wa Iringa Mhe. Peter Serukamba amewaasa wafanyakazi kuwa na utaratibu wa kujiwekea akiba kwa ajili ya maisha yajayo. Mhe. Serukamba amesema hayo alipokuwa akiongea na wafanyakazi katika maadhimisho ya siku ya wafanyakazi Duniani (Mei Mosi) ambayo kimkoa imefanyika katika uwanja wa Samora – Iringa May 01, 2024.

“Ndugu wafanyakazi tukumbushane kuwa muda unaenda na wakati ni ukuta, hivyo tusitarajie kuwa siku zote tutakuwa kazini.  Naomba kukumbusha kila mmoja wetu kujiwekea mpango mzuri wa kustaafu au kustaafishwa na hapa nataka niwaombe na niwashawishi kuanza utaratibu mpya wa uwekaji akiba”.

Aidha, Mhe. Serukamba amewataka wafanyakazi kutunza maadili katika utendaji wakitimiza majikumu yao ofisini na maeneo mengine katika kuwahudumia wananchi huku akiwakumbusha sekta binafsi kuhakikisha kuwa wanaongozwa na sheria katika kushughulikia masuala ya wafanyakazi.