RC IRINGA AWAASA WASAFIRISHAJI WANAOPITA MKOA WA IRINGA KUFUATA SHERIA

Imewekwa : December 11th, 2023

Mkuu wa Mkoa wa Iringa Mhe. Halima Dendego amewaasa wasafirishaji wanaopita kwenye maeneo mbalimbali ya Mkoa wa Iringa kufuata sheria ikiwa ni pamoja na kulipa kodi ya serikali na ushuru wa Halmashauri kwa mujibu wa sharia. Mkuu wa mkoa ameyasema haya alipo kuwa akikagua na kupata taarifa za vituo ya ukaguzi katika Halmashauri ya Wilaya ya Iringa 11 Desemba, 2023.

“Madalali wawe wakweli kwa wateja wao na kila mtu alipe kile anachostahili kwa sababu suala la kodi sasa hivi ni suala rafiki mnakaa mnazungumza, mnajadiliana baada ya hapo mmekubaliana huu ndio uhalisia mtu analipa” amesema.

Kuhusu suala la rumbesa, mkuu wa mkoa amesema suala hilo halikubaliki kisheria na kama mtu atabainishwa na kulipa faini, hiyo haimfanyi dereva aendelee na kosa lake kwa maeneo mengine bali anapaswa kurekebisha kosa lake.

Sanjari na hayo, Mhe. Dendego amewapongeza viongozi wa Halmashauri ya Wilaya ya Iringa inayoongozwa na Mkurugenzi Mtendaji (W) Wakili Bashir Mhoja na viongozi kutoka TRA kwa kazi kubwa na nzuri wanayoifanya  ya ukusanyaji wa mapato ya serikali.

Kwa upande wake Mkurugenzi Mtendaji wa Halmashauri ya Wilaya ya Iringa Wakili Bashir Mhoja amefafanua changamoto za mara kwa mara zinazotoka kwa wasafirishaji kama ifuatavyo;

• Wasafirishaji kuwa na vibali vilivyopitwa na muda wake wa matumizi
• Wengine wanaficha soya chini na kuweka mahindi juu hivyo kulipia mahindi badala ya saya jambo linalokosesha mapato
• Mizigo kuwa na rumbesa jambo ambalo linapunguza mapato ya serikali pamoja na kuwatia hasara wakulima.
• Wasafirishaji kulipa ushuru mdogo ukilinganisha na mzigo wanaousafirisha kwa kutoa taarifa za uongo.
• Wengine kusafirisha bidhaa haramu mfano nyavu za kuvulia samaki zinazokatazwa, vipodozi nk.

Vituo vya ukaguzi vilivyo tembelewa na kukaguliwa ni pamoja na kituo cha ukaguzi Migoli, kituo cha igingilanyi na kituo cha Wenda

Maeneo mengine ambayo Mkuu wa Mkoa ameyatembelea na kukagua miradi ni shule ya Msingi Migoli, na vyumba vya madarasa katika shule ya Msingi Tanangozi.