WENYEVITI WA VIJIJI NA VITONGOJI IRINGA DC WAPATIWA MAFUNZO

Imewekwa : January 19th, 2025

Wakumbushwa kutambua majukumu na mipaka yao ya kazi.

Wenyeviti wa vijiji na vitongoji kutoka vijiji 134 na vitongoji 745 vya Halmashauri ya Wilaya ya Iringa wapatiwa nafunzo kupitia semina elekezi iliyoendeshwa na walimu kutoka Chuo cha Serikali za Mitaa Hombolo kuanzia Januari 18 hadi 19, 2025.

Akizungumza katika kituo cha Shule ya Sekondari Pawaga Tarafa ya Ismani, Kaimu Mkurugenzi wa Halmashauri ya Wilaya ya Iringa ndugu Exavery Ruyagaza amewapongeza viongozi wote waliochaguliwa kwa ngazi malimbali na kusema kwamba wananchi wamewachagua kwa sababu kwanza waliaminika na wananchi hao, hivyo hata mafunzo na elimu  wanayoipata wakiwapelekea wananchi wataendelea kuaminika zaidi kuliko wengine kwani ni chaguo lao.

“Kwa hiyo nawaomba sasa kwa kuwa mmeaminika, haya mnayoyapata hapa mkiwapelekea wananchi watayaamini na kuyapokea Zaidi kuliko mtu yeyote kwa sababu wewe ni chaguo lao”

Aidha ndugu Ruyagaza amesisitiza wajumbe juu ya ushiriki wa mikutano na vikao vya kisheria kwenye vijiji jambo ambalo limekuwa ni tatizo maeneo mengi. Kwa upande wa jitihada mbalimbali za kimaendeleo ndugu Ruyagaza amefafanua juu ya mpango O & OD ambapo amesema usemi kwamba jamii inajenga boma Serikali ije imalizie umepitwa na wakati badala yake jamii inapaswa kuandaa mipango kamili ya miradi na bajeti.

Kwa upande wake Ndugu Robin Gama kwa niaba ya Afisa Utumishi wa Halmashauri amesisitiza juu ya haiba ya kiongozi kwenye jamii anayoiongozi pamoja na kuzingatia maadili kwani kiongozi anapaswa kuonesha njia na mfano mwema kwa watu wake na kuwaasa viongozi kuwajibika kwenye kazi zinazowapatia kipato halali.