RC IRINGA APONGEZA UTEKELEZAJI WA MIRADI IRINGA DC

Imewekwa : October 25th, 2023

RC IRINGA APONGEZA UTEKELEZAJI WA MIRADI IRINGA DC

Mkuu wa Mkoa wa Iringa Mhe. Halima Dendego amefanya ziara ya kutembelea na kukagua utekelezaji wa Miradi ya maendeleo katika Halmashauri ya Wilaya ya Iringa tarehe 25.10.2023 na kutoa pongezi kwa usimamizi mzuri wa miradi hiyo.

Miradi iliyotembelewa na kukaguliwa ni

• Zahanati ya kijiji cha Mwambao ambapo serikali imetoa kiasi cha shilingi milioni hamsini ili kuwaunga mkono wananchi na wadau wengine wa maendeleo katika kuhakikisha kuwa huduma za afya zinatolewa kijijini hapo. Jingo la zahanati pamoja na miundombinu yake mingine imeshakamilika bado vifaa tiba ambapo pia utaratibu wa upatikanaji wake umeshafanyika.
• Ujenzi wa shule ya sekondari ya kata ya Ulanda(Weru) ambapo kazi ipo kwenye hatua za mwishoni. Kiasi cha shilingi milioni miatano zilipokelewa na serikali ili kutekeleza shughuli ya ujenzi wa shule hii mpya.
• Ujenzi wa mabweni 2, madarasa 3, na matundu 6 ya vyoo kwa fedha kutoka serikalini na wadau wa maendeleo (Barrick) kaziimeshakamilika.

Mkuu wa Mkoa amemshukuru Mhe. Rais wa Jamhuri ya Muungano wa Tanzania Mhe. Dkt. Samia Suluhu Hassan kwa namna fedha za miradi zinavyomiminika na kutoa wito kwa wananchi kumuunga mkono.

Akizungumza wakati wa kukagua ujenzi wa shule ya sekondari ya kata ya Ulanda(Weru) Mhe. Dendego amesema, “Kwa fedha zote hizi zinazomiminika kwenye miradi, tumpe zawadi Rais wetu Mama Samia Suluhu Hassan kwa Kumuunga mkono”.

Pia Mhe Dendego ametoa pongezi kwa Mkurugenzi Mtendaji wa Halmashauri ya Wilaya ya Iringa Wakili Bashir Muhoja kwa utendaji na usimamizi makini wa miradi sanjari na makundi mengine yaliyochangia kufanikisha kazi.

Kwa upande wa uwezeshwaji  kiuchumi kwa akinamama na vijana, Mhe. Dendego ametoa agizo kuwa 60% ya mikopo yote ielekezwe vijijini na asilimia  40% itabaki kwenye miji midogo na miji mikubwa na kwamba vijijini wanahitaji tu elimu na uwezeshwaji ili mambo yao yaende.

Naye Mkurugenzi Mtendaji wa Halmashauri ya Wilaya ya Iringa Wakili Bashir Muhoja amesema shule ya sekondari ya kata ya Ulanda(Weru) tayari imeshapata usajili na mipango iliyopo ni kupokea wanafunzi wa kidato cha kwanza na cha pili ili kuwapunguzia wanafunzi adha ya kutembea umbali mrefu hadi Kalenga.